मंगळवेढा प्रतिनिधी:-
संत विचारांची आणि मौलिक तत्वांची प्रबळ अशी परंपरा लाभलेल्या मंगळवेढा संतभूमी मध्ये सामाजिक क्रांतीचा विचार आपल्या उराशी संस्थापक दामाजी माळी यांनी सुरू केलेल्याज्ञानसंस्कार परिवार आणि गुरुकुल पूर्व प्राथमिक विद्यालय या संस्था म्हणजे उज्वल भविष्य निर्मितीच्या पिढ्यांचे सारस्वत भांडार असल्याचे प्रतिपादन पुणे विभागीय शिक्षक मतदार संघाचे माजी आमदार दत्तात्रय सावंत यांनी व्यक्त केले आहे.
अक्षरगंगा प्रज्ञाशोध परीक्षा सांगली, एक्सलंट ऑलिंपियाड परीक्षा,नवोदय पूर्व परीक्षा व ब्रेन डेव्हलपमेंट एक्झाम मधील गुणवंत विद्यार्थ्यांचा बक्षीस वितरण समारंभ लक्ष्मीनारायण मंगल कार्यालय येथे माजी आमदार दत्तात्रय सावंत यांच्या शुभहस्ते उत्साहात संपन्न झाला, त्याप्रसंगी ते विद्यार्थ्यांना व शिक्षकांना मार्गदर्शन करत असताना बोलत होते. कार्यक्रमाच्या अध्यक्षस्थानी महात्मा गांधी विद्यालय वाघोली या विद्यालयाचे मुख्याध्यापक चिदानंद माळी हे होते.
कार्यक्रमाचे स्वागत पर प्रास्ताविक करताना संस्थापक दामाजी माळी यांनी सांगितले की,गुणात्मक आणि दर्जात्मक शिक्षणाच्या गुणवत्तेचा ध्यास घेऊन ज्ञानसंस्कार परिवार व गुरुकुल पूर्व प्राथमिक विद्यालय या दोन्ही संस्थांनी अनेक विद्यार्थ्यांच्या बौद्धिक कौशल्यांना निरनिराळ्या स्पर्धात्मक व्यासपीठावर अनेक परीक्षांच्या माध्यमातून आपली संकल्प सिद्धता सिद्ध करण्याची संधी प्राप्त करून दिली आहे.
केवळ चार भिंतीतील शिक्षणाचा विचार समोर न ठेवता विद्यार्थी केंद्रित सर्वांगीण विकासाचा आणि परिपूर्ण अध्ययन- अध्यापन प्रगतीचा मार्ग आखून घेत या संस्थांनी तालुक्याच्या शैक्षणिक क्रांतीचा एक वेगळा विचार मंगळवेढा संत भूमीमध्ये रुजवला आहे. यापुढील काळामध्ये ही गुणवत्तेची ही परंपरा कायम ठेवण्यासाठी आम्ही सर्वोतोपरी प्रयत्नशील राहू असा विश्वास ही त्यांनी यावेळी दिला आहे.
पुढे बोलताना माजी आमदार सावंत यांनी सांगितले की, विद्यार्थ्यांनी आपली वाटचाल आत्मविश्वासाने व सकारात्मक विचारसरणीने पुढे नेऊन समाजाच्या प्रगतीत आपला मोलाचा वाटा उचलावा, अशा शुभेच्छा माजी आमदार सावंत यांनी व्यक्त सर्व यशस्वी विद्यार्थ्यांचे विशेष अभिनंदन केले.
समाजाभिमुख शिक्षण हेच यशाचे मूळ आहे आणि विद्यार्थी समाजाचे भविष्य आहेत, हे अधोरेखित करून त्यांना उज्ज्वल भविष्यासाठी प्रेरणा देऊन मार्गदर्शन मार्गदर्शन करणारी समर्पक सारस्वत साधनेचे केंद्रबिंदू म्हणून ज्ञानसंस्कार परिवार व गुरुकुल पूर्व प्राथमिक विद्यालयाने प्रस्थापित केलेली ओळख ही सर्वांगीण समाज व्यवस्थेची गुरुकिल्ली असल्याचेही त्यांनी यावेळी आवर्जून नमूद केले.
यावेळी महाराष्ट्र टेक्निकल इंस्टिट्यूटचे अध्यक्ष दत्तात्रय खडतरे'ॲग्रीक्रॉस कंपनीचे अजय अदाटे, मनोज माळी, दामाजी माळी,सचिन माळी,प्रशांत तोडकरी आदी उपस्थित होते.
मुख्याध्यापक चिदानंद माळी म्हणाले की,संस्कार आणि संस्कृती यांची विद्यार्थीदशेतील पायाभरणी होण्यासाठी सक्षम आणि प्रबळ शिक्षण व्यवस्था ही काळाची गरज आहे.
तंत्रज्ञान युक्त पुढारलेल्या ए.आय.नामक जगाच्या पाठीवर कौशल्य पूरक विद्यार्थी घडवण्यासाठी अशा स्पर्धात्मक परीक्षा घेणे ही काळाची नितांत गरज आहे. काळाची ही पावले ओळखून ज्ञान संस्कार परिवार व गुरुकुल परिवार यांनी सुरू केलेला हा विधायक उपक्रम निश्चितपणे उज्वल भविष्य निर्मितीचे यशस्वी प्रतीक असल्याचे त्यांनी यावेळी सांगितले.
आभार अजय आदाटे यांनी मानले. कार्यक्रमासाठी ज्ञानसंस्कार परिवार, गुरुकुल पूर्व प्राथ. विद्यालय शिक्षकवृंदांनी परिश्रम घेतले
