प्रतिनिधी:-
सोमवार, दिनांक १० नोव्हेंबर २०२५ रोजी सासवड येथे पार पडलेल्या शालेय विभागीय बॉल बॅडमिंटन स्पर्धेत मंगळवेढ्यातील जवाहरलाल प्रशालेच्या १४ वर्षांखालील मुलांच्या संघाने नेत्रदीपक कामगिरी करत अव्वल स्थान पटकावले.
या उत्कृष्ट कामगिरीमुळे जवाहरलाल प्रशालेच्या संघाची राज्यस्तरीय बॉल बॅडमिंटन स्पर्धेसाठी निवड झाली आहे.
या विजयी संघामध्ये श्रेयस शिवकुमार स्वामी,स्वराज योगेश भगरे,जय राजेंद्र भेंकी,आतिश संदीप भालेकर, प्रतीक खंडू कोकरे,जयदीप पांडुरंग गवळी,विवेक राजकुमार कोकरे,शौर्य मामासाहेब गुंड,संदेश प्रवीण चौगुले आणि शौर्य सुभाष दत्तू या खेळाडूंनी अतिशय कौशल्यपूर्ण खेळ सादर करून संघाला यशाच्या शिखरावर नेले.
संघाचे मार्गदर्शन शिवकुमार स्वामी, शहाजी ढोबळे आणि नितीन मोरे यांनी केले.त्यांच्या प्रामाणिक मेहनतीमुळे व नियोजनबद्ध प्रशिक्षणामुळे विद्यार्थ्यांनी उत्तुंग यश संपादन केले.
या विजयानंतर प्रशालेचे मुख्याध्यापक तसेच मंगळवेढा एज्युकेशन सोसायटीचे सर्व सन्माननीय सदस्यांनी विजयी खेळाडू व मार्गदर्शक शिक्षकांचे मनःपूर्वक अभिनंदन केले आणि पुढील राज्यस्तरीय स्पर्धेसाठी शुभेच्छा दिल्या.
ही कामगिरी जवाहरलाल प्रशालेच्या क्रीडा क्षेत्रातील प्रगतीचे द्योतक ठरत असून, मंगळवेढ्याचा गौरव वाढवणारी आहे.
