मंगळवेढा:-
छत्रपती शिवाजी महाराजांचे शेती व शेतीविषयक आदर्श धोरण तरुणांना कळावे आणि त्यातून समाजात शेतकऱ्यांचा सन्मान व्हावा याकरिता शेतकरी राजाच्या सन्मानार्थ मंगळवेढा येथील वारी परिवार सायकल क्लबच्या ५० सायकलस्वारांनी मंगळवेढा-किल्ले पन्हाळा २१० किलोमीटरचा सायकल प्रवास करून पत्रके वाटून जनजागृती करण्यात आली.
यावेळी शिवा काशीदांच्या समाधी स्थळी दीपोत्सव करण्यात आला मंगळवेढा हे संत परंपरेचे,श्रमशीलतेचे आणि शेतकरी संस्कृतीचे पवित्र स्थान असुन या भूमीतून उगम पावलेली सायकल मोहिम पन्हाळा गडापर्यंत जात असताना कोल्हपूरच्या ऐतिहासिक दसरा चौकात जोरदार स्वागत करण्यात आले.
सदर सायकल मोहीम शेतकरी राजाच्या सन्मानार्थ आणि युगपुरुष छत्रपती शिवाजी महाराज यांच्या शेतीविषयक विचारांचे स्मरण म्हणून एक जनजागृतीचे अभियान ठरली आहे शिवरायांनी आपल्या काळात शेतकरी हा राज्याचा कणा असल्याचे अधोरेखित केले होते. त्यांची कृषीधोरणे,जलसंधारणाची दृष्टी आणि ग्रामविकासाची विचारसरणी आजही प्रेरणादायी आहे. हाच विचार या सायकल मोहिमेने समाजापर्यंत पोहोचवण्याचा प्रयत्न केला आहे.
मंगळवेढा ते पन्हाळगड हा प्रवास शारीरिकदृष्ट्या आव्हानात्मक असला तरी या सायकलस्वारांच्या मनातली सामाजिक तळमळ,शेतकऱ्यांबद्दलची कृतज्ञता आणि राष्ट्रनायकांबद्दलचा आदर हेच त्यांच्या प्रवासाचे खरे इंधन ठरले असुन प्रत्येक गावात आणि चौकात त्यांनी लोकांशी संवाद साधत शेती,पर्यावरण आणि आरोग्य यांबद्दल जनजागृती केली ही मोहीम म्हणजे केवळ सायकलिंग नाही,तर शिवरायांच्या विचारांशी निष्ठा आणि समाजाशी नाळ जपण्याचा एक प्रयत्न आहे समाजातील तरुणांसाठी प्रेरणादायी ठरेल,आणि शेतकरी हा राष्ट्राचा खरा राजा आहे हा संदेश जनमानसात रुजविला आहे.
मंगळवेढा ते पन्हाळगड असा प्रवास हा इतिहास संस्कृती आणि लोकजागृतीचा संगम ठरला असुन सर्व स्तरातून कौतुक होत आहे पन्हाळा गडावरती सदर सायकल मोहिमेच्या समारोपात सर्व सायकलस्वारांना सन्मानचिन्ह देऊन सन्मान करण्यात आला.
यावेळी आमदार विनय कोरे यांनी मोहिमेचे कौतुक करीत शुभेच्छा दिल्या.सायकल मोहिमेसाठी अर्जुन पाईप इंडस्ट्रिजचे दत्तात्रय भुसे,रमेश फडतरे,पन्हाळ्याचे मुख्याधिकारी चेतन माळी,डॉ.राजेंद्र मेथे,आबासाहेब घाडगे,दत्तात्रय पुजारी,डॉ.आप्पासाहेब पुजारी,किरण बिरादार,डॉ.सोमेश यावलकर,वेद देसाई,डॉ.शिंदे,धिरज पवार,आकाराम दुधाळे,अफरोज शेख,हणमंत मिसाळ,अक्षय पोवार यांचे विशेष सहकार्य लाभले.
