संवाद न्यूज पोर्टल

ब्रेकिंग न्यूज

Post Top Ad

टेक्नॉलजी

शेती विषयक

आरोग्य

Recent Posts

View More

शनिवार, २१ नोव्हेंबर, २०२६

मंगळवेढा : मंगळवेढा येथील मंगळवेढा ऑफिसर्स यांच्या पुढाकारातून सुरू करण्यात आलेल्या अभ्यासिकेतील विद्यार्थ्यांसाठी भारतीय पोलीस सेवेतील (IPS) अधिकारी बिरदेव सिद्धांप्पा ढोणे यांच्या मार्गदर्शनपर कार्यक्रमाचे आयोजन करण्यात आले होते. यावेळी त्यांनी स्पर्धा परीक्षांची तयारी करणाऱ्या विद्यार्थ्यांना अभ्यासाचे नियोजन, वेळेचे व्यवस्थापन, सातत्यपूर्ण अभ्यास आणि यश संपादन करण्यासाठी आवश्यक असलेल्या महत्त्वपूर्ण बाबींवर मार्गदर्शन केले. कोल्हापूर जिल्ह्यातील कागल तालुक्यातील यमगे गावचे रहिवासी असलेल्या बिरुदेव ढोणे यांनी अत्यंत प्रतिकूल परिस्थितीवर मात करत शिक्षण पूर्ण केले. मेंढपाळ कुटुंबातून आलेल्या बिरदेव यांनी पुण्यातील प्रतिष्ठित COEP महाविद्यालयातून अभियांत्रिकीचे शिक्षण घेतले. त्यानंतर केंद्रीय लोकसेवा आयोगाच्या (UPSC) नागरी सेवा परीक्षा २०२४ मध्ये अखिल भारतीय स्तरावर ५५१ वा क्रमांक मिळवत भारतीय पोलीस सेवेत (IPS) स्थान मिळवले. त्यांचा संघर्षमय आणि प्रेरणादायी प्रवास ग्रामीण भागातील तरुणांसाठी निश्चितच दिशादर्शक ठरत आहे. यावेळी मंगळवेढावासीयांच्या वतीने IPS बिरदेव ढोणे यांचा सन्मान करण्यात आला. विद्यार्थ्यांशी संवाद साधताना त्यांनी स्पर्धा परीक्षेच्या तयारीसाठी सातत्याने रिव्हिजन करणे, महत्त्वाच्या विषयांचे योग्य नियोजन करणे, वेळेची कदर ठेवणे, परीक्षेचा पॅटर्न समजून घेणे, किरकोळ चुका (Silly Mistakes) टाळणे, अभ्यासातील ज्ञानाची उणीव (Knowledge Gap) भरून काढणे आणि स्वतःच्या हस्ताक्षरातील नोट्स तयार करणे या बाबींवर विशेष भर दिला. प्रयत्न न केल्याचा पश्चात्ताप अपयशाच्या पश्चात्तापापेक्षा मोठा! विद्यार्थ्यांना प्रेरित करताना त्यांनी प्रत्येकाने आपल्या आयुष्यात निश्चित ध्येय ठरवून त्या दिशेने सातत्याने प्रयत्न करणे आवश्यक असल्याचे सांगितले. प्रयत्न न केल्याचा पश्चात्ताप हा अपयशाच्या पश्चात्तापापेक्षा कितीतरी मोठा असतो, असा मोलाचा संदेश त्यांनी दिला. या कार्यक्रमात बिरदेव डोणे यांच्यासोबत व्यासपीठावर उपस्थित राहण्याची आणि त्यांच्या कार्याचा गौरव करण्याची संधी मिळाल्याचा आनंद व्यक्त करत AGRICOS EXPORTS PVT. LTD. च्या वतीने मॅनेजिंग डायरेक्टर अजय आदाटे यांनी त्यांचा छायाचित्र देऊन सन्मान केला. वारी परिवार चे मंगळवेढे भूमी संतांची हे पुस्तक भेट देण्यात आले. ग्रामीण भागातील विद्यार्थ्यांना स्पर्धा परीक्षांसाठी योग्य मार्गदर्शन मिळावे, त्यांच्यामध्ये आत्मविश्वास निर्माण व्हावा आणि अधिकाधिक विद्यार्थी प्रशासकीय सेवेत दाखल व्हावेत, या उद्देशाने मंगळवेढा ऑफिसर्स यांनी सुरू केलेला अभ्यासिकेचा उपक्रम कौतुकास्पद असल्याची भावना यावेळी IPS बिरदेव ढोणे यांनी व्यक्त केली. योग्य नियोजन, सातत्यपूर्ण अभ्यास, नियमित उजळणी आणि प्रबळ इच्छाशक्ती यांच्या जोरावर कोणतेही ध्येय साध्य करता येते, असा प्रेरणादायी संदेश त्यांनी विद्यार्थ्यांना दिला. यावेळी सोलापूर जिल्हा माध्यमिक शिक्षक पतसंस्थेचे माजी चेअरमन विलास आवताडे, सुनील पाटील, वारी परिवाराचे अध्यक्ष सतीश दत्तू, कृषितज्ज्ञ अजय आदाटे यांच्यासह विद्यार्थी व मान्यवर उपस्थित होते.

कार्तिकी वारीत वारी परिवारचा व्यसनमुक्तीचा जागर.

test banner